Ronald Koeman ka folur në prag të ndeshjes kundër Celta de Vigo. Trajneri hollandez ka pranuar se e ardhmja e tij nuk do të jetë e qartë deri në fund të sezonit. Kur mbeten të luhen edhe dy javët e fundit të kampionatit, skuadra katalanase është katër pikë larg kreut, i cili mbahet nga Atlético Madrid. Pra, shanset e titullit janë thuajse zero.
Objektivi – “Unë mendoj se gjëja e rëndësishme është të besojmë, të vazhdojmë, të fitojmë dhe të shpresojmë. Ne e dimë se shanset për të fituar janë të vogla, por nëse ka ende shanse, duhet të fitojmë ndeshjet tona dhe të presim”.
E ardhmja – “Nuk mund t’ju shpjegoj shumë nga ajo që ndodhi në takimin tim me Laporta. Ne kemi biseduar për Barçën, ekipin, rezultatet e fundit. Jemi pajtuar të flasim më gjatë kur të mbarojë sezoni”.
Analiza – “Ju duhet të analizoni të gjithë sezonin, duke ditur vështirësitë. Aktualisht jemi të zhgënjyer, sepse kishim mundësinë ta mbyllnim në vendin e parë, si kampionë. Është e rëndësishme që një trajner të ketë besimin e klubit dhe unë dua të vazhdoj nëse është kështu. Do ta shohim situatën në fund të sezonit. Unë dua të vazhdoj, jam i lumtur, por ka shumë hapësirë për t’i përmirësuar gjërat. Rruga nuk përfundon këtu, ka gjëra të përmirësuara, të dhëna mbresëlënëse, por do të doja të flisja në fund për to. Brenda dy javëve gjithçka shkoi nga e përsosura në diçka të tmerrshme. Dhe nuk është e drejtë”.
La Liga – “Nëse analizoni sezonin, ne ishim 13 pikë larg kreut dhe u kthyem, me shumë përpjekje. Reali dhe Atlético gjithashtu humbën pikë. Kundër Granadës humbëm një mundësi të shkëlqyer për titullin, kjo është e vërtetë”.
Grupi i lojtarëve – “Ndihem shumë i mbështetur nga dhoma e zhveshjes. Mundohem të flas dhe të marr vendime. Gjithmonë mendoj për klubin. Unë e lashë Mingueza të luante me ekipin B, pavarësisht situatës sonë. Duhet ta falënderojmë lojtarin. Unë nuk jam i zhgënjyer me lojtarët. Ka qenë një sezon i vështirë. Janë pesë ose gjashtë futbollistë, që kanë luajtur 35-40 ndeshje. Jam përpjekur t’i shfrytëzoj më së miri. Mendoj se tifozët kanë parë një ekip, që ka luajtur ndeshje fantastike. Në disa ndeshje nuk kemi qenë në nivelin e duhur”.
Transferimet – “Nuk është koha të flasim për këtë çështje, kemi edhe dy ndeshje për t’i luajtur. Jemi duke punuar dhe duhet të respektojmë lojtarët që kemi”.
