Viktor Lindelëf ka lindur më 17 korrikun e vitit 1994, ditë që u luajt finalja e madhe e Botërorit mes Brazilit dhe Italisë. Ishte dita historike kur Roberto Baxho gaboi nga pika e bardhë e 11-metërshit, por kjo në fakt nuk ka shumë lidhje me historinë e mbrojtësit të Suedisë. E vërteta është që babai i tij ishte një tifoz i çmendur i futbollit dhe vendosi që të shihte penalltitë përpara se të priste djalin e tij të lindte.
Lajmin e ka thënë vetë Lindelëf, i cili përmes një interviste tregon se i ati ishte i emocionuar për lindjen e tij, por pastaj filloi të kërkonte për një televizor ku të shihte penalltitë. “Sigurisht që im atë ishte i lumtur dhe plot alegri. Por, më kanë treguar se në ato momente kur unë erdha në jetë ai kishte thënë:
‘Perfekte gjithçka, por më thoni ku mund të gjej një televizor’. Nëna ime nuk e kishte pritur mirë këtë dhe i kishte thënë: ‘Vërtet do të largohesh?’ E di e di që nuk është mirë, por tani është momenti kur do të goditen penalltitë”, tregon vetë mbrojtësi i Suedisë.
