Verën e vitit 2017, Milani hodhi sytë nga Andrea Konti, për të cilin derdhi në arkat e Atalantës 24 milionë euro, teksa përfshiu në akord, asokohe 20-vjeçarin Mateo Pesina të vlerësuar një milion euro.
Katër vite më pas, mesfushori i formuar në akademinë kuqezi ka 40-fishuar vlerën, ndërkohë që Milani mund ta ribleljë me 50 për qind ulje falë një akordi në momentin e shitjes. Edhe ndaj Austrisë ishte ai që blindoi rezultatin në favor të ekipit të tij pasi sfida në kohën e rregullt kishte përfunduar pa gola. Pas ndeshjes, 24- vjeçari nuk u besonte syve, siç e konfirmoi edhe në deklaratat për mediat e pranishme në stadiumin “Wembley” të Londrës.
“Ende përpiqem të ndërgjegjësohem për golin dhe gjithçka ka ndodhur me Uellsin, e lëre më atë që ka ndodhur sonte (të shtunën). Ky gol ishte emocionues, e unë do ta mbaj me vete si një kujtim të bukur deri në fund të karrierës sime, edhe pse ajo sapo ka filluar”. Më pas mendimet e tij shkojnë te grupi, të cili i kushton rritjen e tij. E të mendosh që duhej dëmtimi i Pelegrinit që Mançini ta grumbullonte, teksa në tabelën e stadiumit, pas golit, emri i tij shoqërohej me numrin 27 ndërkohë që mban 12- ën.
“Gjëja më e mirë është që kaluam turin me një fitore tjetër dhe kjo është ajo që vlen. E keni parë që çdokush mund të shënojë këtu dhe është bukuria e kësaj skuadre, mendoj se mund ta shihni që ne jemi një grup i bukur, po ia tregojmë gjithë Italisë, kush luan bën mirë, kush futet në të njëjtën gjë dhe mendoj kjo është gjëja më e veçantë.
Goli im si një pikturë? Mos e teprojmë, por sigurisht që na dha shumë gëzim, ishte një shpërthim pas një ndeshje kaq të vështirë dhe të dhimbshme”, përfundoi Pesina.
