Partizani arriti të triumfonte edhe në sfidën e dytë ndaj Sfintulit me rezultatin 2-3, duke u kualifikuar për në raundin e dytë të Ligës së Konferencës. Pas fitores 5-2 në “Elbasan Arena”, të kuqtë e Ilir Dajës, nuk falën as në transfertën moldave, ku arritën të triumfonin me përmbysje pas golave të Carës dhe dopietës së Stenio Zhunior.
Një sukses mëse i merituar ky i skuadrës kryeqytetase, që ishte dominuese në të dy përballjet. Tashmë “demat” i pret një përballje tepër e vështirë ndaj Bazelit, pas 1 jave. Një ekip me emër në arenën e futbollit Europian, që kërkon një impenjim të madh.
Fale kualifikimit në turnin e dytë, të kuqtë do të fusin në arkat e tyre edhe 350 mijë euro të tjera nga UEFA, duke çuar totalin në 600 mijë euro përfitime nga Liga e Konferencës. Ndërkohë për sa i përket sfidës ndaj Bazelit, ajo pritet të sjellë përfitime të mëdha edhe nga të drejtat televizive.
