Partizani ka kryer seancën e fundit stërvitore në Shqipëri. “Demat e kuq” ndryshuan sërish ambient, duke u stërvitur në stadiumin e Kamzës.
Dy ditë më parë reshjet e shiut i zhvendosën të kuqtë në kompleksin stërvitor “Football Republic” me bar artificial, ndërsa ditën e djeshme stërvitja u krye në fushën e Kamzës që është me bar natyral. Stërvitja ishte kryesisht e përqendruar në taktikë dhe Daja përgatiti disa strategji për t’i vënë në zbatim në sfidën kundër Bazelit.
Seanca startoi në orën 18:30 dhe zgjati për rreth 2 orë. Ndërsa ditën e sotme, ekipi do të niset drejt Zvicrës, ku do të kryejnë konferencat për shtyp gjatë pasdites dhe më pas do të kryejnë edhe stërvitjen e fundit në stadiumin “St. Jakob Park”, për t’u futur zyrtarisht në 24 orët e fundit para startit të ndeshjes.
