Paulo Dibala pritet që shumë shpejt të rinovojë kontratën me Juventusin, pasi afrimi i trajnerit të ri Maks Alegri do ta vërë sulmuesin argjentinas në qendër të projektit të bardhezinjve.
Dibala ka çuar në delir tifozët e Juventusit duke ndarë më fansat e tij në “Instagram” disa momente nga takimi me legjendën e klubit bardhezi Aleksandro Del Piero. Fotoja u bë shumë shpejt virale, ku shumë futbollistë të Juves nuk nguruan të komentonin, teksa tifozët bardhezi mendojnë se ky është një ogur i mirë për rinovimin e kontratës.
Dibala para pak kohësh refuzoi të rinovonte kontratën që i skadon në verën e vitit tjetër, duke pasur pretendime të larta për rrogën, por deri në fund të muajit gusht agjenti i tij Jorge Antun pritet të zbarkojë në Torino për të mbyllur marrëveshjen e re.
