Ish-presidenti i Bayern Munich, Uli Hoeness, ka kritikuar sjelljen e anglezëve në prag të fiales së Euro 2020 Itali-Angli.
“Nëse do të kisha kohë për të ndezur një qiri për Italinë, do ta bëja. Anglezët sillen në mënyrë absurde. Mbaj mend se një vajzë me fanellën e Gjermanisë qante dhe i gjithë stadiumi bërtiste kundër saj”, ka thënë Hoeness.
“Ose kur vërshëllenin himnin e Danimarkës. Ky nuk është shpirti sportiv që anglezët promovojnë gjatë gjithë kohës. Kanë një kryeministër (Boris Johnson) që nuk më pëlqen aspak”, ka shtuar ish-presidenti i bavarezëve.
“Kur mendoj si do të sillet sot me fanellën e Anglisë, ndërsa 60 mijë persona janë të infektuar nga coronavirus-i, më bën të çmendem. Për të gjitha këto, tani kam një antipati kundrejt anglezëve. Ndër të tjera, janë larguar nga Europa”, ka përfunduar Hoeness.
