Në shtëpinë e Milanit, është dita e Olivier Giroud. Sulmuesi i ardhur nga Chelsea, i cili arriti në Milano të enjten, filloi ekzaminimet mjekësore te klubi kuqezi. Francezi, në mëngjes shkoi në klinikën “La Madonnina” për të kryer testet rituale që i paraprijnë nënshkrimit, ndërsa pasdite pritet të firmosë kontratën që do ta lidhë atë me “Djallin”.
Për Giroud është gati marrëveshja me bazë 1 sezon dhe 3.5 milionë euro neto pagë, me opsionin për ta zgjatur “martesën” edhe një sezon tjetër. Në planet e menaxherëve kuqezinj, tashmë kampioni i botës do të rrisë peshën specifike dhe nivelin e përvojës në repartin sulmues, duke vepruar si “alter ego” e Ibrahimoviç, sidomos në funksion të Ligës së Kampionëve.