Liga e Serisë A po mendon të bëjë një ndryshim. Presidenti i Federatës Italiane, Gabriele Gravina, po bën presion për një format të ri të kampionatit italian të futbollit dhe për një reformë të sistemit.
Perspektiva e bërë e ditur disa muaj më parë është ndryshimi i kalendarit, duke filluar nga sezoni 2023/’24, por hapi i parë do të jetë më 21 korrik ku ndryshimet e mundshme do të diskutohen në Asamble.
Një nga temat e nxehta do të jetë kthimi i kampionatit në 18 skuadra, nga 20 që janë aktualisht.
Klubet e ligës italiane do të takohen për të vlerësuar efektet e mundshme të ndryshimeve të ardhshme në formatin e Serisë A. Asambleja do të jetë gjithashtu një mundësi për të provuar diskutimin e futjes së ndonjë “play off”-i dhe “play out”-i.
E gjithë kjo jo para kampionatit 2023/’24, për të cilin ndryshimet do të duhet të vendosen paraprakisht. Nga ana tjetër, nuk do të kishte problem në lidhje me të drejtat televizive edhe me zvogëlimin e ekipeve pjesëmarrëse.
Gjatë negociatave në mbledhjen e fundit, Seria A në fakt ka rezervuar mundësinë për të ndryshuar formatin e garës në sezonet e ardhshme.