Stadiumi i ri në Rrogozhinë ditën e djeshme ka pasur vizitorë, ndërkohë që punimet po vijojnë me intensitet të plotë nga firma që po zbaton projektin e ndërtimit.
Mesditën e së premtes shefi i licencimeve pranë FSHF-së, Eduart Gjini, me dy pjesëtarë të tjerë ishin prezentë në stadiumin e ri. Tashmë që gjithçka po shkon sipas planeve të hedhura në planin ndërtimor të përgjithshëm, gjatë vizitës së dytë brenda pak kohësh, vetë shef Gjini i shoqëruar nga stafi i tij e ai rrogozhinas mbeti i befasuar nga e gjithë ecuria.
Drejtuesit vendës, nga presidenti Agim Demrozi, administratori Olsi Dranga e drejtori sportiv Klevis Murati, shoqëruan kudo inspektuesit.
Qëndrimi prej dy orësh vërtetoi përmirësimet midis vizitës së parë e punës së bërë deri tani në impiant. Veçanërisht është arritur përfundimi total dhe ndarja e shkallëve.
Kjo i ka dhënë pamje shumë të veçantë të gjithë sipërfaqes aktuale të tifozëve. Te qëndrimi i tifozërive të vendësve e miqve, nga sa u vu re, duhen kompletuar me stola. Gjithashtu edhe tribuna VIP e hyrje-daljet e personave në stadium po kompletohen.
Edhe në brendësi po punohet për përfundimin e dhomave, impiantin e vaditjes, pompat për vaditje në çdo stinë. Një tjetër veçori është mbjellja e barit të fushës që ka nisur të mbijë. Firma e kontraktuar po bën të pamundurën që brenda
afatit të dorëzojë fushën e blertë. Vëzhgimi i parë jep pritshmëri të mira dhe çdo gjë deri tani është brenda parametrave. Mësohet se është i arritshëm afati i fundit i caktuar në bisedimet e kryera në hapat e parë.
Detyrat – Vështrimi në çdo pjesë të ndërtimit nga të dërguarit e institucionit të futbollit bëri që çdo gjë që kërkohet do të përmbushet pa kurrfarë problemi. Porositë e lëna janë të vogla e nuk është se prishin ecurinë totale në shtëpinë e re të Egnatias. Ajo që mbetet kusht është vendqëndrimi i kamerave për VAR-in që është detyrim për të gjitha klubet e Superiores. Nga rrogozhinasit u premtua se stadiumi do të përmbushë çdo pritshmëri, standardet dhe kushtet e UEFA-s dhe FIFA-s.
Për sa i përket mbjelljes së barit të fushës e njëjta firmë ka qenë pjesëmarrëse në stadiumin “Flamurtari”, atë të Apolonisë si dhe Turbinës, pa harruar riparimin e disa pjesëve të barit në “Air Albania”. Vetë puna efikase jep siguri që edhe në planin serioz të nisur tek Egnatia gjithçka është solide.
Përfundimi i vizitës i la të kënaqur drejtuesit e futbollit, ndërsa ata të palës rrogozhinase janë të qetë se parashikimi është në rrugën e duhur. Rrogozhinasit mendojnë që në elitë të debutojnë me shtëpi të re ndryshe nga më parë, që sezoni të ketë mbarësinë e kërkuar. Përshpejtimi i ritmit tregon se koha është premtuese deri në mbylljen tërësore të veprës.
