Ishte paralajmëruar nga “Panorama Sport” më datën 19 qershor, teksa tashmë është arritur akordi total. Besart Krivanjeva do të vijojë karrierën te Egnatia në Kategorinë Superiore. 25-vjeçari u zyrtarizua ditën e sotme si përforcimi më i ri i klubit rrogozhinas.
Në sezonin e fundit, Krivanjeva ka qenë titullar i padiskutueshëm me Shkupin në Superligën maqedonase, duke mbajtur dhe shiritin e kapitenit dhe tashmë do të luajë për herë të parë në Shqipëri.Rrogozhinasit e drejtuar nga Gugash Magani, kanë fituar duelin me disa klube nga Maqedonia dhe Kosova, teksa kanë arritur të bindin futbollistin 25-vjeçar, i cili luan në qendër të mbrojtjes dhe si mbrojtës i majtë.
Krivanjeva në të kaluarën është aktivizuar edhe me përfaqësueset e moshave të Maqedonisë së Veriut, teksa pas përfundimit të sezonit me Shkupin, ishte lojtar i lirë.