Përfundon aventura e Arbin Zejnullait në klubin e Shkëndijës së Tetovës. Kuqezinjtë kanë bërë të ditur se 22-vjeçari, pjesëtar i përfaqësueses Shpresa në të kaluarën, ka ndërprerë marrëveshjen me tetovarët dhe tashëm është futbollist i lirë.
“KF Shkëndija komunikon ndërprerjen e bashkëpunimit me Arbin Zejnullain. Klubi dhe mesfushori me marrëveshje të dyanshme kanë vendosur të ndajnë rrugët, duke respektuar dëshirën e futbollistit për të kërkuar mjedis ku do të ketë më shumë hapësira për lojë”, shkruhej në komunikatën e tetovarëve për futbollistin.
Për Zejnullain ka patur vazhdimisht interesim, edhe nga klubet e Superiores, por asgjë nuk është konkretizuar për faktin se ai vazhdonte të ishte i lidhur me ngjyrat kuqezi të Shkëndijës. Tani, gjithçka është e hapur dhe nuk është çudi që Zejnullai të transferohet së shpejti drejt kampionatit shqiptar.
