Jurgen Çelhaka pritet të jetë sot në Poloni për të kaluar testet mjekësore dhe për të firmosur kontratën e re me skuadrën polake. Në fakt, java e fundit ka qenë vendimtare për lojtarin e bardhebluve.
Transferimi ka ardhur si rrufe, pasi Legia kërkonte me ngulm një mesfushor qendre. Ka qenë menaxheri Lek Kcira që ka mbyllur gjithçka gjatë pak ditëve.
Marrëveshja do të jetë 4-vjeçare, ndërsa lojtari do të marrë më shumë se 10 mijë euro në muaj, teksa shtohen edhe bonuset për tituj apo gola e aktivizime.
Lojtari është goditja e dytë e Legias te bardheblutë. Më parë ishte Ernest Muçi që kaloi nga Tirana te kampionët e Polonisë.
TAKIMI – Jurgen Çelhaka dje ka udhëtuar nga Greqia në Tiranë. Menjëherë ai ka takuar shokët në stërvitje, duke u përshëndetur, pasi tani do të nisë një aventurë të re jashtë Shqipërisë.
Në fakt, për mesfushorin ishin disa skuadra që interesoheshin, duke filluar nga Rapidi i Vjenës, Hajduku, Gorica, Sivaspori, Koniaspori dhe Sasuolo.
Lojtari ka qenë titullar në të gjitha sfidat e Superiores duke kthyer stabilitetin e munguar në mesfushën e Tiranës.
Jurgen Çelhaka ka luajtur 17 ndeshje këtë sezon me fanellën e Tiranës, ndërsa sezonin e shkuar 28 në kampionat, pa llogaritur Kupën e Shqipërisë dhe Europën.