Kaleb Ekuban është tani edhe zyrtarisht një futbollit i Xhenoas në Serinë A,. Sulmuesi italo-ganez, ka nënshkruar sot kontratën trevjeçare me klubin në elitën e futbollit italian dhe do të kthehet të luajë në vendlindje, të cilën e braktisi për Partizanin në vitin 2016.
Klubi i Xhenoas bëri të ditur se ka depozituar në federatë kontratën e lojtarit, të cilin e ka përshkruar duke kujtuar edhe arritjet e karrierës së deritanishme, mes të cilave edhe praninë në radhët e të kuqve kryeqytetas.
“Ka në karrierë një pjesëmarrje në fazën finale të Kupës së Afrikës (2019(, përveç fitores së një Superkupe apo Kupës së Turqisë me Trabzonspor, skuadra e tij e fundit (20 gola në 83 ndeshje). Ka zhvilluar sezonin 2019/20 në Europa League (4 gola në 5 ndeshje). Dhe në 2016/17, me Partizanin (Shqipëri), ka luajtur edhe në Ligën e Kampioneve”, kujton ndër të tjera klubi i Xhenoas në komunikatën zyrtare për transferimin e sulmuesit.
Ekuban ishte protagonist me fanellën e Partizanit në sezonin 2016-2017, duke shënuar 17 gola në 34 ndeshje në Kategorinë Superiore, 1 gol në 2 ndeshje në Kupën e Shqipërisë, ndërsa nuk gjeti rrjetën në 4 ndeshjet e Ligës së Kampioneve apo 2 në Ligën e Europës me të kuqtë. Megjithatë, ai shënoi një nga penalltitë në kualifikimin historik të atij edicioni të të kuqve ndaj Ferencvaroshit.
