Interi dhe Antonio Konto i thanë lamtumirë njëri-tjetrit për shkak të “vizioneve të ndryshme mbi projektin teknik për të ardhmen e klubit”. Ky është konkluzioni i nxjerrë nga procesverbali i mbledhjes se aksionarëve të klubit zikaltër, i cili u zhvillua më 8 korrikun e kaluar.
Siç raportohet nga “Calcio e Finanza” e cila kishte akses në dokumentet, për përfundimin e kontratës, trajnerit 52-vjeçar do t’i paguhet gjysma e pagës së kontratës për sezonin 2021-2022.
Gjatë takimit, një nga aksionerët kërkoi “sqarim në lidhje me arsyet që e çuan kompaninë të njohë një pagesë pushimi për trajnerin”.
CEO i zikaltërve, Marota u përgjigj duke informuar se në fund të sezonit të kaluar klubi dhe trajneri u takuan, dhe ata morën parasysh disa vizione të ndryshme në lidhje me projekti teknik për të ardhmen e klubit. Kësisoj palët vendosën me marrëveshje reciproke që të ndërpresin bashkëpunimit.
Nëse flasim me shifra, largimi i Kontes i ka kushtuar Interit rreth 6.5 milion euro neto, gjysma e 13 milionë eurove të parashikuara në marrëveshje.