Stadiumi “Air Albania” duket se më në fund ka shpëtuar nga problemi kryesor i këtij impianti, gjendja jashtë parametrave e tapetit me bar natyral që kishte. Tashmë në stadiumin kryeqytetas është shtuar tapeti i ri hibrid, me shtresë bari sintetik të ndërthurur me natyral dhe kjo pritet të zgjidhë përfundimisht një shqetësim që e kishin ngritur edhe futbollistë kuqezi.
Për shkak të shtrimit të tapetit të ri, u vendos që ndeshjet e përfaqësueses të muajit shtator të lëviznin drejt “Elbasan Arena”, në mënyrë që bari të mos dëmtohej dhe të ishte gati për sfidat e radhës të tetorit e më tej.
Në videon e siguruar nga “Panorama Sport”, shfaqet gjendja aktuale e impiantit, pasi ka përfunduar shtrimi i plotë i tapetit. Gjithçka duket në kushtet optimale, për të pritur përfaqësuesen në muajt e ardhshëm, por edhe disa nga ndeshjet kryesore të kampionatit shqiptar.