Humbja e thellë 4-1 ndaj Polonisë sigurisht që ka lënë të zhgënjyer trajnerin e përfaqësueses shqiptare, Edi Reja, por njëkohësisht, ai është munduar që të gjejë anët pozitive në paraqitjen e skuadrës. Para largimit nga stadiumi në Varshavë ai ka folur edhe për mediat vendase, duke insistuar se jo çdo gjë ishte për t’u hedhur poshtë nga kjo sfidë e sidomos pjesa e parë e takimit.
“Jam pjesërisht i kënaqur. Nuk mund të ankohem rreth skuadrës time pasi në disa momente dukej më mirë se ajo polake. Ne kishim 3 mundësi të mira shënimi por nuk ishim të aftë që të përfitonim nga ato. Vojçieç Shezni u paraqit mjaft mirë”, tha fillimisht tekniku italian.
Ai më pas nuk harroi të përmendte edhe bashkëkombësin e tij, gjyqtarin Mauricio Mariani. “Nuk mund të jemi plotësisht të kënaqur me vendimet e tij. Nuk e di nëse duhej të fitonim apo jo një penallti. Nuk dua të dukem si një italian tipik i cili kritikon gjyqtarët, por disa situata mund të interpretoheshin në mënyrë të ndryshme”, vijoi 75-vjeçari. “Në 10 minutat e para gjyqtari tregoi tre kartonë të verdhë dhe mendoj se jo të gjithë këto faulle meritonin kartonin. Nuk ishte e drejtë”.
Në fund, kishte elozhe edhe për Levandovskin, i cili u bë personazhi kryesor i sfidës me golin dhe asistin e tij në momente vendimtare. “Levandovski as nuk ka nevojë për një mundësi të mirë për të shënuar. Ai është një futbollist i cili bën një diferencë të madhe”, ishin fjalët e Rejas
