Saliu Guindo, Klinti Qato, Bashkim Velija, Mario Dajsinani, Marko Roganoviç, Renato Ziko, Dejan Zarubica, Ilirid Ademi dhe Viktor Velkoski.
Janë këta lojtarët e afruar deri më tani në merkaton e verës nga klubi i Laçit. Mirëpo, “Panorama Sport” mëson se presidenti Pashk Laksa po përgatit edhe dy goditje të mëdha, në mënyrë që trajneri malazez, Dejan Vukiçeviç, të ketë një grup të kompletuar në masën 100 % para fillimit të sezonit.
Merkato mbyllet të dielën e 5 shtatorit në orën 24:00 dhe menaxherët e klubit kurbinas, bashkë me drejtorin Naim Halili, mësohet se janë në bisedime intensive me dy lojtarë.
Gazeta zbulon rolet e tyre dhe bëhet fjalë për një mesfushor qendre, që mund të jetë edhe numër 10, por gjithashtu një sulmues, i cili përshtatet mirë në majë apo nga krahët.
Gjasat janë që të jenë të dy shqiptarë, pasi edhe numri i të huajve në skuadër është rritur ndjeshëm, në një kohë që në fushë nga minuta e parë lejohen vetëm 5.
Drejtuesit bardhezi mbajnë sekret emrat e lojtarëve që po negociojnë për shkak se ende nuk kanë arritur marrëveshjet zyrtare me ta.
