Sezonin e shkuar Partizani e kishte merkaton e bllokuar dhe trajneri i sapoemëruar asokohe, Ilir Daja, nuk kishte mundësinë të ndërtonte ekipin ashtu siç dëshironte vetë.
Në janar, me hapjen e merkatos, u mundua ta rregullonte disi ekipin dhe të afronte disa elementë që i përshtateshin lojës së tij. Ndërsa këtë verë, mendohej se do të kishte më në fund mundësinë të ndërtonte skuadrën ashtu siç e mendonte, por jo vetëm që nuk ndodhi diçka e tillë, por ndodhi edhe një eksod largimesh, ku emrat më të rëndësishëm të ekipit, u larguan.
Si pasojë, trajnerit të Partizanit dhe drejtuesve të klubit iu duhej të ndërtonin ekipin nga e para, por me tre muaj në dispozicion u mendua se gjithçka do të rregullohej.
Ditët e merkatos kalonin një e nga një dhe te Partizani dominonte qetësia, me zyrtarizimet që ishin me pikatore dhe me goditjet “big” që mungonin.
Por, në ditën e fundit të merkatos, “demat” zyrtarizuan plot 7 afrime. Çfarë paradoksi, edhe kur trajneri Daja kishte të gjithë verën në dispozicion, sërish do t’i duhet ta përshtatë një ekip nga e para..
