Willy Sagnol (18.03.1977, Saint-Etienne) punon në mënyrë që bota të flasë për Gjeorgjinë nga përvoja e një ish-lojtari nënkampion bote në vitin 2006, me atë Francë të Zidane, trashëgimtar i kurorës së dyfishtë 1998- 2000. Në mars, ai bëri që Spanja të djersinte në Tbilisi. Ai dha një intervistë interesante për “Marca”:
A prisni që skuadra juaj të shfaqë të njëjtën fytyrë kundër Spanjës si në ndeshjen e Tbilisi?
Kur luani kundër Spanjës duhet të jeni shumë të vetëdijshëm se në realitet nuk keni asgjë për të humbur dhe keni shumë gjëra që mund t’i tregoni botës. Ky duhet të jetë mentaliteti ynë.
Në mars e vendosët Spanjën pas litarëve… Çfarë ju thatë lojtarëve tuaj para ndeshjes?
Të luanin me zemër, por edhe me tru. Jam shumë krenar për atë që bënë, por është gjithashtu e vërtetë që kam ndjenjën se ishim në gjendje të jepnim pak më shumë.
A ju befasoi Spanja në Kampionatin Evropian?
Europiani është turneu më i vështirë që ekziston në elitën e futbollit botëror. Dhe Spanja është një nga skuadrat më të mira në atë kompeticion. Kjo thotë gjithçka.
Pas Suedi-Spanjë dhe fitores nordike, a ka ndryshuar përshtypja juaj se cila skuadër e fiton grupin?
E vërteta është se nuk e di se cila skuadër mund të përfundojë e para. Janë dy skuadra të mëdha, me dy stile shumë të përcaktuara dhe të ndryshme, por në mënyrën e tyre janë shumë të fuqishme. Mbeten ende ndeshje dhe gjithçka mund të ndodhë. Sigurisht, Spanja mund të jetë e para, por realiteti është se avantazhi është i Suedisë, sepse ajo ka treguar merita për të qenë lart.
Nëse ju mund të zgjidhni një lojtar spanjoll, cili do të ishte?
Thiago. Ai është një lojtar i madh dhe gjithashtu një person fantastik.
Duke folur për lojtarë të mëdhenj, cili ju vuri në vështirësi më shumë?
Më i vështiri, dhe për këtë nuk kam asnjë dyshim, ishte Luis Figo. Çfarë lojtari!
Dhe më i miri që keni pasur ndonjëherë në skuadrën tuaj?
Kam qenë me fat që kam luajtur së bashku me Zidane në kombëtare. Ishte si një dhuratë nga Zoti.
Na tregoni për punën tuaj në Gjeorgji…
Gjeorgjia nuk është një nga ekipet më të mira në Evropë, por është e vendosur të përmirësohet. Jam krenar që jam zgjedhur për këtë detyrë. Federata po punon shumë me brezat e rinj dhe shpresoj që kjo të krijojë një bazë të mirë për të ardhmen.
Çfarë qëllimi keni vendosur për këtë fushatë kualifikuesesh?
Le të dëgjojë futbolli europian edhe për Gjeorgjinë, le ta dijë se ne po punojmë mirë dhe se po prodhojmë lojtarë për ligat më të mira të kontinentit.
Sidoqoftë, e keni të freskët humbjen me Kosovën në shtëpi…
Në atë ndeshje bëmë shumë gjëra të gabuara, jo vetëm në mbrojtje. Mesazhi im për lojtarët është se duhet të përmirësohemi pothuajse në të gjitha aspektet e lojës, në lidhje me atë ndeshje: mentaliteti, agresiviteti, në mbrojtje dhe sulm…
Me kaq shumë gjëra për të përmirësuar, Spanja nuk duket rivalja më e mirë për t’u përballuar sot…
Ne e dimë që spanjollët janë më të mirë. Ky është një realitet. Gjithashtu, kjo ndeshje ka një kontekst të ndryshëm nga ajo e Tbilisit, por nuk mund të harrojmë të gjitha gjërat që bëmë mirë atëherë, të cilat, për mua, e meritonim barazimin.
Le ta përfundojmë intervistën me një vështrim tjetër në të kaluarën tuaj, në një ndeshje speciale kundër rivalit të sotëm. Çfarë kujtimesh keni nga ndeshja mes Spanjës dhe Francës në “Gjermani 2006”?
Ajo fitore 3-1 në Kupën e Botës në Gjermani erdhi pas një loje të mrekullueshme. Ne fituam, por nuk kishte dallime mes dy skuadrave. Ne e kuptuam se çfarë mund të bënte Spanja me një ekip ku luanin bashkë Xavi, Fabregas, Ramos… Potenciali që kishte ai ekip brenda ishte i qartë.
