Gjermania e Hansi Flik tregoi ‘dhëmbët’ mbrëmjen e djeshme duke mundur thellë 0-4 Islandën për eliminatoret e Botërorit.
Ishte një ndeshje totalisht e dominuar nga panzerat me nga dy gola për pjesë ku të gjithë sulmuesit kontribuan me golat e tyre. Por ajo që tërhoqi vëmendjen ishte një rast i humbur nga sulmuesi Timo Verner në minutën e 61-të të takimit.
Sulmuesi i Çelsit përfitoi bukur nga një aksion i shpejtë nga e djathta duke u vendosur bukur në portën kundërshtar, por gaboi gjithçka në momentin final duke e dërguar topin jashtë kuadratit të portës.
Verner s’i besoi syve, ashtu si dhe shokët e skuadrës të cilët vendosën duart në kokë. Megjithatë sulmuesi justifikoi gjithçka duke vulosur në 0-4 fitoren e Gjermanisë pas një asisti të Haverc në minutën e fundit të lojës.
