Juventusi arriti të barazojë 1-1 mes polemikave të shumta në frymën e fundit ndaj Interit me një penallti të shndërruar në gol nga Paulo Dibala.
Sulmuesi argjentinas ishte deçiziv në këtë takim, teksa sapo u fut në fushën e blertë i dha ritëm lojës bardhezi duke qenë i rrezikshëm me shpejtësinë dhe teknikën e tij.
Sipas asaj që shkruan faqja njohur e statistikave “OPTA Paolo”, Paulo Dibala hyn në historinë e “Zonjës së Vjetër” duke qenë lojtari i parë që shënon në tre ndeshje radhazi ndaj Interit në Serinë A në epokën e tre pikëve për fitore.
27-vjeçari nuk ka qenë në nivelet e tij më të mira këto vitet e fundit, por këtë sezon duket se po vjen në lartësinë e duhur teksa në 6 sfida të aktivizuar në total me Juventusin, Dibala ka shënuar 3 gola.
