Arlind Ajeti është rikthyer përsëri në futbollin italian, 5 muaj pas eksperiencës së fundit atje me fanellën e Rexhianës në Serinë B.
28-vjeçari ka nënshkruar me skuadrën e Padovës në Serinë C duke nisur një tjetër aventurë në karrierën e tij. Në prezantimin si futbollist i Padovës, Ajeti është shprehur se nëpërmjet kësaj eksperience do të tentojë të fitojë dhe një herë fanellën e Kombëtares, me të cilën nuk grumbullohet prej disa kohësh.
“Jam i lumtur që klubi më ka dhënë këtë mundësi, e di historinë e këtij ekipi dhe e di se si funksionon. Jam pozitiv sepse shoh që të gjithë këtu duan të ngjiten në Serinë B.
Në dy-tre grumbullimet e fundit nuk jam thirrur nga Shqipëria dhe shpresoj të arrij të rifitoj një fanellë falë këtij klubi. Prisja të ngelja pa skuadër pas kaq shumë kohësh që u largova nga Rexhiana, por Covidi ka komplikuar gjithçka, tani shpresoj të jem në gjendje të mirë për disa javë”.
Situata e çuditshme e Ajetit ka bërë që futbollisti i cili shihej si një titullar i paprekshëm në radhët e kuqezinjve pas Euro 2016, të zhdukej për disa kohe nga grumbullimet kuqezi, duke luajtur rrallëherë në tre vitet e fundit. Hera e fundit që ai ka luajtur me kombëtaren shqiptare ishte suksesi 2-0 në San Marino në marsin e këtij viti.
