Arbnor Muçolli u kthehet përsëri golave spektakolarë në Danimarkë. Ish-mesfushori i përfaqësueses Shpresa ka shënuar një të tillë sot me fanellën e Vejle, duke tundur rrjetën për herë të parë në këtë edicion.
Muçolli kishte qëndruar jashtë për rreth një muaj si pasojë e një dëmtimi, por sot ka treguar se është në formë të shkëlqyer, duke shënuar një supergol ndaj Sonderjyske. Në minutën e 33-të të sfidës, ai fitoi topin në mesfushë dhe nga distanca lëshoi një predhë të pakapshme për portierin kundërshtar.
Goli i dha avantazhin Vejle, e cila më pas triumfoi me shifrat 3-1, duke marrë pikë shumë të rëndësishme në luftën për mbijetesë pasi aktualisht gjendet në vendin e fundit në renditje. Për 22-vjeçarin Muçolli, ky është sezoni i katërt në radhët e klubit danez, ndërsa mendohet se do të jetë edhe i fundit, pasi do të kërkojë një aventurë të re në një kampionat më të fortë.
