“Boxing Day” është një ditë jo shumë e zakonshme për futbollin në Angli. Është në fakt një ditë e veçantë ku festa dhe futbolli bashkohen në një, duke i dhënë një ngjyrë krejt të veçantë festës së Krishtlindjeve në ishull.
Teksa të gjithë kanë “shqyer” pakot e dhuratave – nga këtu vjen dhe emri i vetë “Boxing Day” – janë gati për t’u ulur përpara TV për të shijuar magjinë e futbollit në Premier. Sigurisht që një gol në “Boxing Day” është një kënaqësi e veçantë për çdo lojtar. Më poshtë janë renditur lojtarët që kanë shënuar më shumë gjatë kësaj dite.
Lista kryesohet nga ish-sulmuesi i kombëtares angleze dhe i Liverpulit, Robi Fauler. Në karrierën e tij ka luajtur 10 takime gjatë “Boxing Day” duke shënuar plot 9 gola.
Pra, është ai mbreti i kësaj dite të veçantë në futbollin në ishull. Por, e veçanta qëndron në faktin se pjesa më e madhe e golave të tij janë shënuar jo me fanellën e Liverpulit, por me atë të Lidsit, 4 ku përmendet tripleta e vitit 2001 kundër Boltonit. Me Liverpulin ka shënuar 3 herë dhe dy gola me fanellën e Mançester Sitit.
Pas tij vjen Herri Kejn me vetëm një gol më pak, por të realizuar në vetëm 6 ndeshje. Në vendin e tretë vjen irlandezi Robi Kin me 8 gola në “Boxing Day”, të ndara; 1 me Koventrin, 5 me Totenhemin dhe 2 me Liverpulin.
Tetë gola për “Boxing Day” regjistron edhe golashënuesi më i mirë i historisë së kampionatit anglez, Alen Shirer, por të shënuara në 11 ndeshje, 4 prej të cilëve me Njukasëllin dhe 4 me Blekbërnin.
Në këtë listë të veçantë nuk mungojnë as emra të tjerë të mëdhenj si Tierri Henri, Frenk Lampard, Stivën Xherrard e me radhë.