Interi ka mbledhur skuadrën dhe stafin, në kuadër të përgatitjeve për ndeshjen kundër Bolonjës që do të zhvillohet më datën 6 janar. Gjithsesi ajo që ka shqetësuar ka qenë mungesa e Edin Xhekos.
Të gjithë të pranishmit bënë kontrollet mjekësore, por boshnjaku u dërgua në shtëpi sepse kishte një të ftohtë. Kjo ka sjellë panik tek zikaltërit pasi dyshohet se lojtari mund të jetë i infektuar me koronavirus.
Priten analizat mjekësore për të saktësuar situatën, por COVID-i është rikthyer fuqishëm në futboll, ku shumë lojtarë në Serinë A janë infektuar kohët e fundit.
