Andre Onana është një objektiv shumë i kërkuar në merkato, duke marrë parasysh faktin që portierit i skadon kontrata në qershor dhe transferimi i tij me parametër zero është joshës për këdo.
Pavarësisht interesit, Interi duket se është rikthyer i pari në hierarkinë e zgjedhjeve të 25-vjeçarit, që deri para pak ditësh kishte shprehur hapur pëlqimin e tij për Barcelonën.
Por ditën e djeshme në Milano është parë agjenti i tij dhe sipas “Tuttosport”, arsyeja ka qenë për të hedhur bazat e një akordi që mund të zyrtarizohet në janar.
Portieri i Ajaksit mund të nënshkruajë një kontratë me cilindo klub me hyrjen e vitit që po vjen dhe kjo do të jetë koha kur do të përcaktohen edhe detajet e fundit e nëse gjërat vazhdojnë kështu, ardhja e Onanës në Milano do të jetë vetëm një formalitet.
Por deri në hedhjen e firmave, tek Interi e dinë mirë se duhet të qëndrojnë vigjilentë dhe të mposhtin konkurrencën, për të bërë të mundur që nga 1 korriku të kenë mes shtyllave gardianin kamerunas.