Interi dhe administratori i deleguar i zikaltërve, Bepe Marota po studiojnë një tjetër lëvizje “alla Çalhanoglu” te Milani, ku synohet lideri i mesfushës kuqezi, Fronk Kesi.
Sipas asaj që raporton e përditshmja sportive italiane “TuttoSport”, klubi zikaltër po insiston ta marrë mesfushorin nga Bregu i Fildishtë sepse Suning, i cili ka zgjidhur problemet e likuiditetit deri në afat të mesëm, nuk mund të përballojë shpenzime të konsiderueshme për kartonat e lojtarëve.
Klubi zikaltër nga Milano po vlerëson opsionin Kesi, i cili është në skadencë me Milanin në qershor, por ajo që peshon te Interi janë shumat e konsiderueshme që dëshiron vetë mesfushori afrikan ku i tejkalojnë 7 milionë eurot në sezon përfshirë bonuset.
