Fiorentina-Juventus është një ndeshje me rivalitet shumë të madh. Akoma më shumë këtë vit pas transferimit të Dusan Vlahovic nga klubi vjollcë te Zonja e Vjetër në merkaton e janarit. Një lëvizje që ka zhgënjyer dhe zemëruar pothuajse të gjithë Firencen.
Sulmuesi serb do të kthehet në “bazë” të mërkurën në mbrëmje për ndeshjen e vajtjes së gjysmëfinaleve të Kupës së Italisë. Për lojtarin ka folur ish-drejtuesi i klubit vjollcë Pantaleo Corvino, i cili ka kujtuar në një intervistë për La Stampa-n momentet kur e ka marrë Vlahovic nga Partizani i Beogradit në 2018-ën.
Drejtori aktual i përgjithshëm i Lecce-s ka deklaruar:
“E mora Vlahovic për 1.5 milionë euro dhe dikush ka thënë se ishte i shtrenjtë, por Della Valle-t patën besim tek unë. Mamaja e lojtarit më tha suke qeshur: ‘Po ju jap Batistutën e ri’. Dhe unë iu përgjigja: ‘Më mjafton Toni i ri’. Në gjurmët e tij ishin edhe Juventus-i me Atalanta-n në Itali, ndërsa nga jashtë interesoheshin Arsenal-i dhe Borussia Dortmund-i”.
