Pas dopietës së shënuar me bluzën e Italisë kundër Turqisë dhe me një më me peshë që pritet të marrë në vazhdim në sulmin e kombëtares së Roberto Mançinit, Xhakomo Raspadori ka bindur totalisht drejtuesit e Juventusit.
Siç raporton “TuttoSport”, bardhezinjtë kanë nisur zyrtarisht nga dita e djeshme kontaktet me homologët e tyre te Sasuolo për të gjetur formulën e duhur, e cila pritet të ketë të njëjtat kritere si 35 milionët që u shpenzuan për Manuel Lokatelin.
Oferta përfshin një huazim me detyrim blerjeje brenda tri viteve të ardhshme, por me Juventusin që kërkon të paguajë këstin e parë të 40 milionë eurove që do të ofrohen, duke nisur nga vera e vitit 2023.
