Real Madrid dhuron spektakël brenda në “Camp Nou”, thyen Barcelonën me “poker” golash duke siguruar një biletë për në finalen e Kupës së Mbretit. Carlo Ancelotti, Benzema, Modric etj, “banda” e vjetër e Realit, vërtetuan edhe një herë se janë ekspertë kur bëhet fjalë për sfida të tilla. Ekipi i Xavit pëson një tjetër “shuplakë” duke bërë që objektivi i tyre i vetëm tashmë të mbetet titulli në La Liga.
Sfida nisi me pak tension, me pak raste për shënim, deri në minutën e 45-të ku Vinicius Jr kaloi Realin në avantazh. Në fraksionin e dytë, stafetën e mori Karim Benzema me “bomberin” francez që realizoi një “tripletë” golash. Në minutën e 50-të, Benzema mori një asist nga Modric duke dyfishuar shifrat, ndërsa tetë minuta më pas ishte Vinicius që fitoi një 11-metërsh për faull në zonë nga Kessie. Nga pika e bardhë, Benzema u tregua i saktë duke trefishuar rezultatin. Benzema u shërbye në çdo formë, në të 80-tën ishte Vinicius që e nxori të vetëm përballë Ter Stegen duke realizuar golin e tretë personal dhe të katërtin për Realin.
Për herë të parë pas 60 vitesh, që nga koha e Ferenc Puskas, një lojtar i Realit shënon “tripletë” në “Camp Nou”. Në finale, Reali do të përballet me Osasuna. “Çfarë vallëzimi”, shkruan Marca në faqen e parë. “CO i dhimbshëm”, ishte titulli i përzgjedhur nga Sport.
