Me çështjen titull të mbyllur prej kohësh, Napoli mund t’ia lejojë vetës ndonjë hap fals siç ndodhi këtë javë teksa nuk shkuan më shumë se një barazim pa gola përballë Verona-s. Si Napoli, ashtu edhe Milan, të dy ekipet janë me mendje tek përballja ndërmjet tyre në Champions, në ndeshjen e kthimit, pasi edhe kuqezinjtë zhvilluan një rotacion total përballë Bologna-s duke u ndalur në një barazim 1-1.
Nëse Napoli nuk rrezikon asgjë, në shtëpinë e Milanit nuk mund të qëndrojnë të qetë, pavarësisht se për momentin ndodhen në zonën Champions, në vendin e katërt në kuotën e 53 pikëve, dy më shumë se sa Inter.
Me Napoli, Milan e Inter që janë me mendje në Champions, Lazio e Roma po përfitojnë në maksimum. Ekipi i Sarrit vijon ecurinë shumë të mirë duke blinduar vendin e dytë në Serie A.
Pas fitores së pastër 0-3 në transfertë përballë Spezia-s, Lazio e sheh veten plus 5 pikë në raport me Romën e vendit të tretë.
Edhe ekipi i Jose Mourinho-s siguroi një fitore të pastër 3-0 përballë Udinese-s, Bove, Pellegrini dhe Abraham ishin autorët e golave.
