Mbrojtësi portugez Joao Cancelo nuk e ka ende të qartë se ku do të luajë sezonin e ardhshëm. Ai e mbylli sezonin e fundit i huazuar te Bayern Mynih, por nga 1 korriku është kthyer sërish në bazë, te skuadra e Manchester City, duke qenë në dispozicion të trajnerit Pep Guardiola.
Gjithsesi, ky i fundit nuk dëshiron ta ketë 29-vjeçarin portugez në ekip, ndaj Cancelo do të lihet sërish i lirë të largohet. Ideja ishte që portugezi të transferohej te Barcelona këtë verë, por deklarata e fundit e trajnerit Xavi, që u shpreh se Pep e gënjeu në janar, duke mos ia dhënë portugezin, ashtu sikurse i kishte premtuar, ka përmbysur situatën.
“Xavi-n e kanë mashtruar, nuk është ajo e vërteta në lidhje me Cancelo”, është shprehur Guardiola, që duket se ka vënë veton për të mos lejuar transferimin e mbrojtësit në “Camp Nou”.
Pra, tensionet mes dy trajnerëve kanë vënë në dilemë të ardhmen e Joao Cancelo, që pret të mësojë emrin e ekipit ku do të luajë. Manchester City kërkon 60 milionë euro për lojtarin, shumë që Barcelona nuk e paguan dot, ndaj dhe e dëshironte lojtarin në formë huazimi.