Alvaro Morata është zyrtarisht lojar i Milanit. Pas ekzaminimeve mjekësore të kryera në orët e fundit në Madrid, tashmë vjen njoftimi zyrtar nga klubi kuqezi.
“AC Milan ka kënaqësinë të njoftojë se ka blerë futbollistin Alvaro Morata. Kapiteni i kombëtares spanjolle, me të cilën sapo është bërë kampion i Evropës, Morata ka nënshkruar kontratë me klubin kuqezi deri më 30 qershor 2028 me opsion edhe për një vit”.
Ai ka firmosur një kontratë me vlerë 5 milionë euro plus bonuse në sezon, ndërsa vetë Milani i pagoi Atletiko Madridit klauzolën e lirimit prej rreth 13 milionë euro. Spanjolli do të mbajë fanellën me numrin 7 që i është dhënë nga Jasine Adli (i cili ndryshon në numrin 94). Numri 9 i Milanit, mbetet ende i lirë në pritje të tregut të transferimeve…
