Fundjava do të jetë e zjarrtë në Serie A. Java e 5-të rezervon emocione të forta me duele që ngjallin emocion dhe që mbeten “ajka” e futbollit italian. Gazetat kryesore në Apenine ditën e sotme i kanë rezervuar titujt kryesorë pikërish dy përballjeve më të rëndësishme në Itali këtë fundjavë, derbi Inter-Milan dhe Juventus-Napoli, me 4 skuadrat që janë në linjën e parë të startit, për të synuar scudetton këtë sezon.
Padyshim vëmendjen kryesore e “rrëmben” derbi i fundjavës mes Interit e Milanit. Të dyja skuadrat milaneze vijnë në këtë derbi me gjendje emocionale të kundërt, teksa Inter ka rritur ndjeshëm vetëbesimin me suksesin që mori pas barazimit 0-0 ne Angli me Citin dhe do të kërkojë të vijojë ecurinë pozitive në derbit përballë Milanit, teksa numëron 6 fitore në 6 sfidat e fundit me “kushërinjtë”. Inzaghi do të ketë grupin e plotë të lojtarëve në dispozicion për këtë sfidë.
Ndërkohë krejt e kundërta mund të thuhet për Milanin.Kuqezinjtë u goditën rëndë, pas humbjes 1-3 në Champions ndaj Liverpool, aq sa në Itali flitet se derbi ndaj Interit do të jetë shansi i fundit për Fonsecën. Një tjetër rezultat negativ do të bënte që Ibra e drejtuesit e “Djallit” të shkarkonin portugezin. Përballë do të jetë Inter, një “tabu” për kuqezinjtë vitin e fundit. Lajme të mira vijnë ndërkohë nga infermieria, me portierin Maignan dhe Calabrian që kanë rikuperuar.
Ndërkohë po kaq interesante do të jetë edhe sfida e së shtunës, ajo që do të luhet në Torino, mes Juventusit dhe Napolit. Të dyja skuadrat vijnë me pertendime të mëdha në këtë sezon, teksa kërkojnë të jenë anti-Interi, për të rivalizuar deri në fund pse jo për titullin kampion. Ajo që e bën edhe më interesante sfidën është rikthimi në Juventus Stadium i Antonio Contes, me teknikun leçes që nuk u prit aspak mirë kur u rikthye si tekniku i Interit 4 vite më parë, të shohim nëse bardhezinjtë do t’i rezervojnë sërish të njëjtën “mikpritje” teknikut, i cili pikërisht lidhur me sfidën ndaj Juventusit u shpreh:
“Historia flet qartë kam kontribuar si lojtari i Juventusi për 13 vite madje edhe si kapiten,më pas punova për 3 sezone edhe si trajner, askush s’mund ta zhbëjë dot historinë. Do të jetë emocionuese të rikthehem në atë stadium. Ndaj Juves do të jetë një test i rëndësishëm. Juventus e rinis këtë sezon më lart se sa ne, pasi Napoli zhvilloi një kampionat jo të mirë sezonin e shkuar, megjithatë të dyja skuadrat kanë dëshirë të rikthehen sërish në nivele të larta, do të jetë interesante”, theksoi ndër të tjera Antonio Conte.
