Sean Dyche nuk është më trajner i Evertonit. Në një komunikatë klubi nga Liverpool njoftoi të enjte shkarkimin e trajnerit dhe bëri të ditur se ish-kapiteni dhe trajneri i ekipit U-18, Leighton Baines, si dhe kapiteni aktual i ekipit, Seamus Coleman do të marrin përkohësisht drejtimin e ekipit të parë.
Ky njoftim erdhi vetëm pak orë para se Everton të fitonte 2-0 kundër Peterborough në FA Cup. Paulo Fonseca, José Mourinho dhe David Moyes janë disa nga emrat që po përmenden për të marrë drejtimin e ekipit historik anglez.
Dyche ishte pjesë e ekipit që nga shkurti i 2023 ku qëndroi në stol për 84 ndeshje. Gjatë kësaj periudhe ai regjistroi 26 fitore, 26 barazime dhe 32 humbje.
Më shumë shanse për të marrë drejtimin e Everton ka David Moyes. Kujtojmë se pjesë e Bluve është edhe Armando Broja që të enjte u dëmtua rëndë dhe doli me barelë nga fusha në FA Cup.
