Çabi Alonso nuk është më trajneri i Real Madrid. Klubi ka bërë të ditur një ditë pas disfatës në Superkupën e Spanjës se spanjolli nuk ishte më në drejtimin e ekipit dhe se i hapte kësisoj rrugën një tjetër zgjidhje të madrilenëve që po e shohin veten shumë larg pritshmërive që kishin kur afruan teknikun nga Leverkuseni.
Alonso mbijetoi në pankinën e Realit vetëm 232 ditë dhe 34 ndeshje, në një periudhë ku rrallëherë tekniku dukej në lartësinë e duhur apo të kishte mbështetjen e plotë të klubit. Përplasjet e tij të vazhdueshme edhe publike me lojtarët, bënë që në fund të ishte ai që paguante për sezonin deri tani me shumë telashe të madrilenëve.
