Pritja mbaroi. Një muaj gëzimi, dëshpërimi, tensioni dhe euforie. Gola, magji dhe gabime të mëdha: gjithçka për të arritur tek dita e sotshme. Në orën 17:00 në stadiumin Luzhniki të Moskës, Franca dhe Kroacia luajnë për trofeun më të rëndësishëm. Më shumë se një miliard njerëz nga çdo vend i globit do të marrin pjesë në një ngjarje që mbetet unike dhe e pakrahasueshme. Do të jetë një finale tërësisht evropiane, midis dy kombëtareve aq të ndryshme por edhe të ngjashme. Kroacia është e paparashikueshme dhe tinëzare, nga ana tjetër grupi i Deschamps është i rregullt dhe i shkëlqyeshëm.
“Gjelat” u ngjitën në majën e podiumit në vitin 1998, por u mundën në vitin 2006 nga Italia. Kurse Kroacia në 1998 kur “Les Blues” festonin titullin, arriti në vendin e tretë. Rekord që tashmë e ka thyer këtë herë. Kjo do të jetë përballja e gjashtë mes këtyre dy kombëtareve, me Francën që është në avantazh, pasi nuk e njeh humbjen, e ka 3 fitore dhe 2 barazime. Precedenti më i fundit që nuk mund të harrohet është ai i gjysmëfinales së Botërorit “France ’98”, kur kroatët kaluan në avantazh me golin e Davor Suker-it, por Lilian Thuram përmbysi ballkanasit dhe i dha fitoren Francës.
Arbitri kryesor i takimit është argjentinasi Nestor Pitanas, kurse asistentët e tij në finale, janë Hernan Maidana dhe Juan Lattes, gjithashtu nga Argjentina.
