Manchester City ka arritur marrëveshje me Swansea Cityn për shitjen e lojtarit të përfaqësueses së Kosovës, Bersant Celina. “Sky Sports” mëson se i riu kosovar i Manchester Cityt do t’i bashkohet Swansea Cityt, që nga ky sezon do të marrë pjesë në Championship, për gati 5 milionë euro.
21-vjeçari i Kosovës, i cili ka qenë vetëm katër herë titullar për Cityn, shënoi shtatë gola në 35 paraqitje në ligë për Ipswichin sezonin e kaluar, ku e kaloi sezonin si i huazuar. Trajneri i Swansea Cityt, Graham Potter, synon ta rikthejë ekipin e tij në Premierligë dhe prandaj i është vënë pas Celinës, i cili i ka shfaqur aftësitë e tij në Championship sezonin e kaluar.
Tani, sipas “Sky”, ai ia ka arritur qëllimit ta sjellë Celinën në skuadër. Ndërkohë, blerja e Riyad Mahrez nga Pep Guardiola ka bërë që shpresat e Celinës për të qëndruar në City të shuhen.
