Newcastle ka prezantuar sulmuesin japonez Yoshinori Muto, i ardhur nga Mainz për 13 milionë euro, pasi ky i fundit mori lejen e punës për në Angli.
26-vjeçari, që la një përshtypje shumë të mirë me Japoninë në “Rusi 2018”, deklaroi: “Jam shumë i lumtur që jam futbollist i Newcastle dhe po pres me padurim të luajë para tifozëve të këtij ekipi. Eshtë një nder për mua dhe do të synoj të shkruaj emrin tim në historinë e klubit.”
Muto kaloi nga FC Tokyo te Mainz në vitin 2015 dhe shënoi 20 gola në 66 ndeshje të luajtura në Bundesliga, ndërsa me kombëtaren e Japonisë ka shënuar dy gola në 25 ndeshje.
Ai bëhet blerja e pestë e Newcastle gjatë merkatos së verës dhe do të garojë me Ayoze Perez dhe Joselu për postin e titullarit. Muto është japonezi i parë që vesh fanellën e “qymyrxhinjve”.