Arsenali e ka mundur Cardiffin 3-2 në një ndeshje drithëruese në të cilën vendasit e rikthyen rezultatin dy herë, por vetëm për t’u mposhtur në fund 3-2 nga “Topçinjtë”. Përpjekjet e shkëlqyera të lojtarëve të Cardiffit nuk mjaftuan, pasi dyshja sulmuesi e Arsenalit ishte e pandalshme për ta në stadiumin e qytetit në Cardiff.
Dyshja shqiptare Granit Xhaka dhe Shkodran Mustafi i dhuruan epërsinë skuadrës së Unai Emeryt, me këtë të dytin që shënoi me kokë pas një harkimi të saktë nga mesfushori i Kombëtares së Zvicrës pas 10 minutave lojë.
Përgjigja e vendasve erdhi në sekondat e fundit të pjesës së parë, kur Camarasa shënoi për t’i barazuar shifrat për herë të parë në këtë takim.
Një kombinim i mirë mes Mesut Ozilit, Alexandre Lacazettes dhe Pierre-Emerick Aubameyang rezultoi me një super gol nga largësia, që Aubameyang e shënoi.
Cardiff s’lëshoi pe as pas golit të dytë të mysafirëve, falë Wardit që realizoi vetëm 12 minuta më pas. Por, Alexandre Lacazette ia dhuroi fitoren e dytë ketë sezon Arsenalit me një gol në minutën e 81-të.
Arsenali tani ka 6 pikë, pas dy humbjeve dhe dy fitoreve këtë sezon.
