Edhe “marsianët” duhet të pushojnë nga koha në kohë. Dhe, në qoftë se pjesa tjetër është imponuar nga UEFA, me skualifikimin për ndeshjen e së martës kundër Young Boys (falë kartonit të kuq ndaj Valencias), Cristiano Ronaldo i ka merituar dy ditët e relaksimit, që i dha Massimiliano Allegri.
Trajneri bardhezi është shumë i kënaqur nga paraqitja e portugezit, sidomos në sfidën e fundit ndaj Napolit, ku i “gatoi” të tre golat e fitores. Ronaldo ka luajtur më shumë nga të gjithë në radhët e Juventusit, 659 minuta, duke pasur mbas vetes Bonucci dhe Szczesny, me nga 630 minuta secili.
Kjo shifër e bën yllin portugez një nga lojtarët më të aktivizuar në të gjithë kampionatin italian, një rekord i përbashkët me 34 kolegë të tjerë të Seria A, të cilët nuk kanë humbur asnjë minutë nga shtatë javët e para.
Pak, nëse jo asnjë, nga këto 34 lojtarë, megjithatë, kanë pasur në këto minuta aktivizim ndikimin e Cristiano Ronaldos për skuadrat e tyre. Sigurisht, askush, sipas faqes së specializuar për statistikat e futbollit (whoscored.com), nuk ka një mesatare vlerësimi 7.99 për ndeshje, çka e bën CR7 lojtarin më të mirë në Seria A, deri tani, duke lënë pas Piatek, bomberin e Genoas (7.76).
