Tashmë është e qartë: Aaron Ramsey nuk do të jetë pjese e Arsenalit prej sezonit të ardhshëm, ose ndoshta që në janar.
Mesfushori i njohur uellsian ka kohë që është në bisedime me klubin për rinovim, por nuk ka pasur asnjë hap përpara dhe kohët e fundit Arsenali ka ndërprerë bisedimet, duke refuzuar të plotësojë kërkesat financiare të talentit të vet.
Ramsey ka qenë lojtar kyç te Arsenali në sezonet e fundit dhe do ishte një goditje e rëndë nëse largohet falas, sepse i skadon kontrata në verë 2019, ndaj nuk përjashtohet largimi që në janar, për të arkëtuar diçka.
Lajmin për largimin e ka dhënë pa dashje kompania që përfaqëson interesat e lojtarit, Avid Sports & Entertainment Group. Në një postim në Twitter, kompania lajmëronte një kontratë sponsorizim të Ramsey-t me një kompani ajrore. Tifozë të ndryshëm reaguan keq, duke kritikuar kompaninë e menaxhimit që jepte lajme të tilla në një koment kur të gjithë presin lajme për të ardhmen e futbollistit.
Përgjigja, që më pas u fshi, ka qenë mëse e qartë: “Nuk kemi çfarë të bëjmë. Është një vendim i klubit, jeta vazhdon”.
