Edhe pse gjatë një pjese të dekadës së viteve ’90, Valencia u kthye në “mace të zezë” për katalanasit, fakti është se, me ndryshimin e shekullit, qasjet rezultative mes të dy ekipeve kanë ndryshuar në mënyrë dramatike. Kjo vlen veçanërisht në lidhje me vizitat e Barçës në fushën e Valencias.
Në fakt, blaugranët janë ekipi më i keq për Valencian në “Mestalla”, vitet e fundit. Fitorja e fundit e saj kundër Barcelonës daton në sezonin 2006-2007, në shifrat 2-1. Që atëherë, Valencia ka pesë humbje dhe gjashtë barazime kundër Barcelonës, në shtëpi.
Messi është lojtari që ka shënuar më shumë gola në historinë e “Mestalla” (24), duke mposhtur mitet e futbollit spanjoll si Zarra (20 gola në fushën e Valencias), Campanal (20, me Sevilla), Cesar (19 gola mes Barçës dhe Granadës) dhe Raul, i cili nënshkroi 18 gola në këtë stadium, si sulmues i Real Madridit.
Edhe trajneri Marcelino nuk është me fat kundër Barcelonës; qoftë në La Liga, apo në Kupën e Mbretit. Ai kurrë nuk ka qenë në gjendje të fitojë ndaj ekipit katalanas. Bilanci i tij kundër Barcelonës është katër barazime dhe nëntë humbje, me nëntë gola në favor dhe njëzet gola kundër.
