Trajneri i Real Madridit, Julen Lopetegui, ka thënë se ai merr përgjegjësi për formën e dobët të skuadrës së tij, e cila u konfirmua nga humbja ndaj Alavesit të shtunën mbrëma.
Ky është fillimi më i keq i një sezoni për një trajner të Real Madridit nën presidencën e Florentino Perezit. Reali u mposht 1-0 nga Alavesi në sekondat e fundit të takimit falë golit të Manu Garcias.
Skuadra e Lopeteguit nuk ka shënuar gol që 6 orë e 49 minuta, teksa nuk di për fitore në tri ndeshjet e fundit në La Liga – një barazim dhe dy humbje.
“Natyrisht, jemi të zhgënjyer sepse deshëm të fitonim dhe e nisem takimin mirë, duke krijuar raste dhe luajtur mirë”, tha Lopetegui.
“Fakti është ama se ne nuk shënuam dhe u ndëshkuam për këtë”, shtoi ai.
“Ishte ndëshkim i rëndë, por ata e shfrytëzuan rastin. Nuk duhet të jemi negativë dhe duhet të jemi të qetë sepse e dimë që është moment i vështirë. Si trajner, jam përgjegjësi i parë”, shtoi ai.
