Trajneri i Manchester Unitedit, Jose Mourinho ishte mbrëmjen e djeshme në Podgoricë, për të ndjekur live derbin e Ballkanit mes Malit të Zi dhe Serbisë. Mediat angleze raportojnë se arsyeja e këtij udhëtimi të portugezit, ka qenë ndjekja nga afër e dy lojtarëve serbë, që janë në planet e tij për t’i transferuar në Angli, që në merkaton e janarit.
Bëhet fjalë për dy futbollistë që luajnë në kampionatin italian, mesfushorin e Lazios, Sergei Milinkoviç-Saviç dhe mbrojtësin e Fiorentinës, 20-vjeçarin Milenkoviç.
Mesfushori bardhekaltër u kërkua edhe në verë nga “djajtë e kuq” por oferta e tyre u refuzua nga drejtuesit e Lazios, ndërsa në Janar, me largimin e Pogba drejt Barcelonës, Manchesteri mund të rritë ofertën për serbin.
Sa i përket mbrojtësit Milenkoviç, ai është një profil mjaft interesant, që po shkëlqen te Fiorentina dhe ka treguar se është i aftë të mbulojë disa pozicione në mbrojtje.
Mourinho e ka shprehur vazhdimisht nevojë ne përforcimeve në mbrojtje, pasi ky repart është edhe “thembra e Akilit” për “djajtë e kuq”, ndaj Milenkoviç mund të ishte një profil interesant, që nuk do t’i kushtojë klubit të Manchesterit më shumë se 30-35 milionë euro.
