Dortmundi po shkëlqen këtë sezon falë punës së Lucien Favre me talentet që ka në skuadër. Një prej tyre është edhe Christian Pulisic, i cili ka tërhequr vëmendjen e klubeve të mëdha, edhe pse aktualisht po vuan nën hijen e talentit tjetër, Jadon Sancho.
Talenti amerikan ka një kontratë deri në vitin 2020 dhe ende nuk ka vendosur ta rinovojë, çka ka rritur interesimin, sidomos të Juventusit, që synon të negociojë për 20-vjeçarin në verën e ardhshme. Pulisic do të ishte përforcimi ideal për krahët e sulmit, por konkurrenca është e madhe, pasi klubet e mëdha angleze dhe Real Madridi gjithashtu janë në garë për sulmuesin.
