“Nuk ekziston anti-Juventus në Itali”. Nëse mendoni se këto fjalë janë thënë nga një tifoz i Juventus ose një drejtues i klubit torinez, gaboheni. Personi që e ka thënë këtë është një “armik” historik i Juventus. Bëhet fjalë për Zdenek Zeman. Çeku nuk ka qenë asnjëherë i butë me “Zonjën”, por tani është i detyruar të dorëzohet para fakteve.
“Në Itali nuk kanë rivalë, nuk ka një anti-Juventus të vërtetë. Inter dhe Napoli (-6 pikë në renditje ) janë në ndjekje, por besoj se në fund do të fitojnë përsëri bardhezinjtë”, ka thënë ish-trajneri i Lazio-s dhe Roma-s.
Më pas Zeman ka folur për Lorenzo Insigne, yllin e Napoli-t të Ancelotti-t. “Me mua ka shënuar më shumë se 20 gola në sezon në dy vite, më pas nuk e ka bërë më”, ka vazhduar Zeman, që ka punuar me sulmuesin te Pescara.
“Është përmirësuar shumë në krahasim me atë kohë dhe ky pozicion i ri po e ndihmon. Kë do të aktivizoja mes Milik dhe Mertens në krah të tij? Sigurisht belgun… preferoj të ‘vegjlit’ që dinë të luajën më mirë me topin në tokë”.