Sokol Çikalleshi vazhdon të mungojë në listën e përfaqësueses shqiptare, por ndërkohë ka filluar të luajë më me vazhdimësi në radhët e ekipit të Goztepe, pasi ka lënë pas krahëve dëmtimet e njëpasnjëshme që e lanë jashtë fushës së lojës në fillimin e sezonit.
Për të tretën ndeshje radhazi në kampionat, trajneri i besoi 30 minutat e fundit në fushë në takimin ndaj Erzurum sulmuesit shqiptar i cili tregoi se ishte në formë të mirë fizike dhe ishte protagonist në golin e shënuar në shtesën e ndeshjes nga Oztekin.
Çikalleshi ishte ai që krijoi aksionin nga erdhi ky gol i sulmuesit për të rihapur ndeshjen që në ato momente ishte në shifrat 2-0 për ekipin mik.
Por Goztepe nuk ia doli të shënonte përsëri dhe u largua me një humbje nga kjo sfidë, duke shpërdoruar mundësinë për t’u ngjitur përkohësisht në vendin e dytë të klasifikimit. Gjithsesi, aktivizimi më i rregullt është një sinjal i mirë për Çikalleshin, i cili dy javë më parë arriti edhe të gjente rrjetën duke realizuar në Kupën e Turqisë për skuadrën e tij.