Luka Jovic është kthyer në objektivin e të gjitha skuadrave të mëdha. Teksa fillimisht ishte Barecelona që u raportua se kishte arritur akord me sulmuesin, më pas doli interesi i Real Madrid dhe Chelsea.
Së fundi, “Goal.com” ka bërë me dije se Manchester City po monitoron situatën rreth lojtarit të Eintracht Frankfurt, i cili po shkëlqen këtë sezon dhe nuk e ka ndër mend të ndalet. Pep Guardiola po kërkon që të bëjë dy përforcime për sezonin e ardhshëm: Një sulmues ose mesfushor me tipare sulmuese dhe një mbrojtës të majtë.
Vetëm në kampionatin gjerman ka shënuar 15 gola dhe ka dhënë 5 asist, duke lënë pas vetes Lewandowski-n dhe Reus-in.
Jovic është lojtar i Benfica dhe është dhënë në huazim për dy vite te Frankfrut, që ka të drejtë ta blejë për 6 milionë euro në fund të sezonit dhe pretendon ta shesë për 60 milionë. Ndërkohë Barcelona i ka ofruar deri tani 40 milionë euro dhe priten zhvillime të tjera në këtë drejtim.
Serbi 21-vjeçar u bë lojtari më i ri që shënoi për Partizanin e Beogradit në moshën 16 vjeçare, ndërsa në sezonin e tij të parë në gjermani u bë lojtari më i ri që shënon 5 gola në një ndeshje të vetme.
